Noraisim - potsiny tetsy Ankadindratombo - Nidoboka am - ponja ilay nisandoka ho Miaramila

Noraisim - potsiny tao amin’ ny trano fonenany teny Ankadindratombo ny tovolahy iray nisandoka ho Miaramila ny 22 jolay lasa teo. Fotoana naharitra no efa nampiahiahy ny mponina teny amin’ ny manodidina ny fihetsik’ ity lehilahy ity. Rehefa niely ny siosion - dresaka momba azy dia nampandre avy hatrany ny Zandary misahana ny Sampana heloka bevava etsy Fiadanana ny fokonolona. Nidina teny an - toerana nijery ifotony ny zava - nisy ireo mpitandro filaminana. Natao ny sava hao ny trano fonenany ka nahitana fanamiana miaramila maro isan – karazany (effets militaire), toy ny « beret rouge » miaraka amin’ ny « macaron », lobaka sy pataloa fitondra miady, baoty « Rangers », fitomboka boribory an’ ny Fitsarana sy ny Akademia miaramila, « macaron » an’ ny Polisy, sabatra. Teo am – panatanterahana ny fanadihadiana natao taminy dia niaiky izy fa azy ireo fitaovana rehetra ireo.
Mifangaro ny jiolahy sy ny Miaramila
Tato ho ato dia hita amin’ ireny asan – jiolahy ireny fa tsy maintsy misy amin’ ireo jiolahy no manao fanamiana miaramila. Tena tsy misy mihitsy ny anavahana azy amin’ izany fa hatramin’ ny basy eny am - pelatanany aza dia ireny karazana basy natokana ho an’ ny mpitandro filaminana ireny. Tsy vitsy amin’ ireto farany ihany koa no mampanofa fanamiana sy fitaovam - piadiana, misy aza no tena manao sy mandray anjara amin’ ireny fanafihana ireny. Maro amin’ izy ireo no efa mamita sazy any am - ponja noho ny fanaovana asan - jiolahy. Raha ny zava - misy ankehitriny dia matahotra  avy hatrany ny mponina raha vao mahita endrika miaramila  vaovao eny an – tanàny.