Adin ’ ny samy Ampanjaka - Nakatona ny zomban ’ Ambatoharanana

« Ny 27 janoary teo izahay no naharay taratasy fa nakatona ny Zomban’ Ambatoharanana. Tsy afaka manao ziara  ao intsony izahay . Talohan’ izany,  dia nisy ny taratasy nalefan’ ny Lehiben’ ny Faritra Diana milaza fa  tsy misy Ampanjaka afa - tsy i Tsimiharo III ao an - toerana », hoy i Somo Sidiny,  solontenan’ ny Ampanjaka Lamboeny V,  omaly teny amin’ ny Carlton Anosy. Mbola tsy milamina araka izany ny disadisa amin’ izy ireo momba ny  fiadiana toerana. Nanambara ity farany fa « izy no napetrak’  ireo olobe fa tsy misy apetraky ny Fanjakana izany ». Taorian’ ny fitsaboana natao azy,  dia nilaza fa  hiverina handray ny fahefany izy nefa izao nakatona izao ny Zomba. Raha ny voalaza,  dia mbola ao Antsiranana ity voaesotra tamin’ ny toerany ity, amin’ izao fotoana izao. Raha tsiahivina,  dia olona roa no maty ary telo hafa no naratra anisan’ izany ny Ampanjaka Lamboeny.

Araka ny fanazavana azo,  dia efa nisy olona fito no voasambotra ny volana desambra teo. Ny 20 novambra no nisavorovoro ny vahoaka tany an – toerana. Nidina nanelanelana izany ny zandary ary niafara tamin’ ny fitifirana. Vokany, olona roa no namoy ny ainy, telo hafa kosa no naratra voatifitra ka anisan’ izany Lamboeny V. Nisy ny fitoriana napetraka teny anivon’ ny Tribonaly momba ity raharaha ity saingy tsy mbola nahitam - bokany izany.